A Compañía Cali está constituída por un equipo humano minuciosamente escollido para xerar equilibrio e potencia artística. Fórmano persoas cunha alta sensibilidade polo que a súa capacidade de transmisión é elevada. Elas son a materia prima e a canle pola que se desenvolve a marca Cali. Son mulleres altamente cualificadas e con moito traballo persoal. Teñen en común os seus coñecementos e preparación profesional en danza contemporánea pero tamén aportan como bailarinas e formadoras as competencias derivadas dos seus outros oficios como pedagogas, mestras en danza tradicional e raíz ancestral así como biólogas e especialistas en sostibilidade. Toda esta variedade fai un calidoscopio de puntos de vista que enriquecen e potencian a Cali.

As obras Cali nacen do proceso interno de cada compoñente e do colectivo. Non buscamos producir nada, simplemente abrimos un campo de creación e inspiración a través do movemento, cunhas bases sólidas, fortes e determinadas de adestramento corpóreo. O material escénico é un medio para traspasar e inspirar a quen observa e levalos á profundidade. Existe información significativa en todo o texto escénico, non presentamos nada puramente estrutural nin baleiro de contido,  porque creamos e practicamos desde un estado de presencia e conexión fonda sostida pola metodoloxía. Nas producións Cali abrazamos todos os aspectos do ser humano: físico, mental e emocional, abríndonos á vastedade dos pulsos enerxéticos. 

“Aínda que ningunha destas verbas nin rexistros audiovisuais poden substituír a experiencia directa de asistir a unha representación do universo escénico de Cali”.